Fotomüsabiqənin qalibləri mükafatlandırıldı
Mingəçevir Dövlət Universitetində Azərbaycan Fotoqraflar Birliyinin təşkil etdiyi foto müsabiqənin qalibləri mükafatlandırılıb.
Demedia.az-a EL TV-dən verilən məlumata görə, universitet tələbələrinin müsabiqəyə göndərdiyi 300-dən çox fotodan 6-sı müəlliflərə qalib adını qazandırıb. Azərbaycan Fotoqraflar Birliyi növbəti müsabiqəni Mingəçevir Dövlət Universitetinin tələbələri arasında keçirdi. Bu müsabiqə də əvvəlkilər kimi eyni məqsədə xidmət edir-gənc istedadların üzə çıxarılması, onlarda fotoqrafiya sənətinə sevgi və marağın artırılması. Amma budəfəki müsabiqə “Heydər Əliyev ili” ilə əlaqədar təşkil edilir. Mingəçevir Dövlət Universitetinin tələbələri “Vətən mənim gözümlə” adlı fotomüsabiqəyə 300-dən çox foto göndərib. 74 nəfər müsabiqə iştirakçısından 6 nəfər fərqlənmə sertifikatlarına layiq görülüb. Azərbaycan Fotoqraflar birliyinin idarə heyətinin üzvləri və Mingəçevir Dövlət Universitetinin rəhbərliyi müsabiqədə qalib gələn tələbələri sertifikatlar və hədiyyələrlə təltif ediblər. Bu kimi müsabiqələrin il ərzində Azərbaycanın digər ali təhsil müəssisələrində də keçirilməsi nəzərdə tutulur.
