Uşaqların Vətən ruhunu oxşayan addım - VİDEO
İgidlərimizin Vətən yolunda göstərdiyi şücaətlər yeniyetmə və gənclərin də vətənpərvərlik ruhunda tərbiyələnməsinə müsbət təsir göstərir.
Onların qəhrəmanlıqları gələcək nəsillər üçün böyük örnəyə çevrilir. Odur ki, Vətən yolunda canını və qanını əsirgəməyən qəhrəmanlarımızın adlarını uc tutmaq və onları daim xatırlamaq hər birimizin ən ümdə borcudur. İgid oğullarımızın xatirəsinin orta ümumtəhsil məktəblərində əbədiləşdirilməsi isə uşaqların Vətən ruhunu xüsusilə oxşayır və onların da gələcəyin qəhrəmanları kimi böyüməsinə müsbət zəmin yaradır. Bu dəfə isə Kürdəmirdəki orta ümumtəhsil müəssisələrindən birində igidimizin adı əbədiləşdirilib. Şəhid gizir Nəzər Əzizovun xatirəsinə ehtiram göstərilib. Kürdəmirin Köhnəbazar kənd tam orta məktəbindəki sinif otaqlarından biri şəhid gizir Nəzər Ağacəlil oğlu Əzizovun adını daşıyacaq. Sinif otağının açılışı olub. Tədbirdə şəhidin ailə üzvləri də iştirak edirdi. Torpaqlarımızın bütövlüyü uğrunda canını fəda edən vətən oğullarımızın ruhu bir dəqiqəlik sükutla yad edildi. Məktəblilərin ifasında şeirlər və müxtəlif kompazisiyalar ifa olundu. Şəhidin anası Cəmafət Əzizova onların ailəsinə göstərilən diqqət və qayğıya görə təşəkkürünü çatdırdı. Qəhrəmanlarımızın adlarının əbədiləşdirillməsi yeniyetm və gənclərin də vətənpərvərlik ruhuna müsbət göstərir. Onlarda bu hissin daha da güclənməsinə səbəb olur. Şəhid Nəzər Ağacəlil oğlu Əzizov 1991-ci ildə Bakı şəhərində anadan olub. 2011-ci ildə hərbi xidməti başa vurduqdan sonra gizirlik kursuna yazılıb. Nəzər 2012-ci ildə gizirlik kursunu bitirdikdən sonra Ağdam rayonunda 2 ay xidmət edib. Sonra Nəzər Xüsusi Təyinatlı Qüvvələrin tərkibində xidmətə başlayıb. 2016-ci ilin aprel döyüşlərində qəhrəmanlıq göstərib. 2-ci Qarabağ müharibəsində başalayanda bütün igid və cəsur azəri oğulları kimi o da cəbhəyə yollanır və düşmənin xeyli sayda canlı qüvvəsi və texnikasının məhv olunmasında əvəzsiz xidmətlə göstərir. 2022-ci il sentyabrın 12-dən 13-ə keçən gecə düşmən təxribatı nəticəsində şəhadətə yüksəlir. Kürdəmirin Şəhidlər Xiyabanında torpağa tapşırılan igidimizin iki övladı-bir qızı və bir oğlu vətənə əmanət qalıb. Şəhid Nəzər Əzizov ölümündən sonra “Vətən uğrunda”, ”Xocavənd, Qubadlı və Suqovuşanın azad olunmasına görə”, ”Şücaətə görə” medalları və 3-cü dərəcəli “Rəşadət” ordeni ilə təltif olunub.
