Xatirələrdə qalan sinif otaqları - VİDEO
Məzunlar ötən günlərə qayıdırlar.
Onlara əlifbanı öyrədən müəllim Nüşabə Mustafayeva keçmiş şagirdləri ilə bir yerdədir. 67 yaşlı məzunlar 50 ildən sonra yenidən parta arxasında əyləşirlər.
Ötən günlərin xatirələri vərəqlənir. Nüşabə müəllim də şagirdləri ilə birlikdə səhifələri çevirərək kövrəlir və sevinir. Ömürlərinin ahıl çağında özlərini şagird kimi hiss edən yaşlı məzunlar müəllimlərinə də pozitiv duyğular yaşadırlar. 50 illik qızıl yubileylərini qeyd edən məzunlar dünyasını dəyişən müəllimlərini, sinif yoldaşlarını, şəhidləri də yad edirlər. Onların ruhuna dualar oxuyurlar. Onların sinifində bir vaxtlar 34 nəfər təhsil alırdı. İndi sinif yoldaşlarının 11 nəfərindən geriyə yalnız şirin xatirələr qalır. Sonra yeni təmirdən çıxan Xaldan məktəbində yaşlı məzunlar üçün infotur təşkil edildi. Onlar müasir texniki avadanlıqlarla təhciz edilmiş sinif otaqları ilə tanış oldular. Məktəbin lövhəsindəki 1963-1973-cü illəri əks etdirən fotostendə baxaraq o günləri yada saldılar. Yeni məzunlara çiçəklər bağışlayaraq xatirə fotosu çəkdirdilər. Süfrə arxasında söhbətlərini davam etdirdilər.
