Pişiklər üçün kruiz marşrutu
Sinqapurda yerləşən "Tall Ship Adventures" şirkəti pişiklər və onların sahibləri üçün unikal kruiz marşrutu açıb. 2,5 saatlıq gəmi gəzintisi müştəriləri Sentos adasına aparır.
Demedia.az verir ki, gəminin göyərtəsində istənilən xarakterli heyvanlar üçün ideal şərait yaradılıb: pişiklər bir-biri ilə ünsiyyət qura, oynaya və ya rahat çarpayılarda, sadəcə, istirahət edə bilərlər. Pişik sahiblərinə gəmidə şam yeməyi verilir, sonunda isə kiçik atəşfəşanlıq nümayiş etdirilir. Səfər 166 dollara başa gəlir.
Son illərdə bütün dünyada ev heyvanları üçün əlverişli otellərin, kafelərin və digər müəssisələrin sayı artır və daşıyıcılar sahiblərinə getdikcə daha çox ev heyvanları ilə, o cümlədən su ilə rahat səyahət etmək imkanı verirlər. Məsələn, Britaniyanın "Cunard" kruiz şirkəti sərnişinlərə ev heyvanlarını Atlantik okeanı boyunca səyahətə aparmağa icazə verən ilk daşıyıcı olub. "Queen Mary 2" hər səfərdə 24-ə qədər ev heyvanı daşıya bilər. Onlar səyahət boyu qida və peşəkar qayğı ilə təmin olunurlar. Yerləşdirmə təxminən 1 min dollara başa gəlir.
Bir çox Avropa ölkələrində və ABŞ-da itlərlə qısamüddətli dəniz və çay səfərləri mümkündür. Məsələn, Norveçdə ev heyvanınızla fyorda səyahətə çıxa bilərsiniz, Texasda delfinlərə heyran ola bilərsiniz, Kaliforniyada isə dördayaqlı sərnişinlər üçün bufet təşkil olunur.
