Məşhur milyonçu Zeynalov məhkəməyə qaloşla gəldi
Ləğv edilmiş Milli Təhlükəsizliyi Nazirliyi Baş İstintaq İdarəsinin rəisi, general-mayor Mövlam Şıxəliyev, istintaq idarəsinin rəis müavini, 1-ci şöbənin rəisi Yasin Məmmədov, istintaq idarəsinin 2-ci şöbənin rəisi, polkovnik Vüsal Ələkbərov və istintaq idarəsinin metodiki yardım və kriminalistika şöbəsinin rəis müavini Sahib Ələkbərovun cinayət işi üzrə məhkəmə prosesi keçirilib.
Axar.az xəbər verir ki, Bakı Hərbi Məhkəməsində hakim Elbəy Allahverdiyevin sədrliyi ilə baş tutan proses bir aylıq fasilədən sonra davam etdirilib.
Hakim Elbəy Allahverdiyev mətbuat nümayəndələrinin açıq məhkəmə prosesində iştirakına yenə də imkan verməyib.
Sonuncu prosesdə iş üzrə zərərçəkən İbrahim Zeynalovun oğlu İlqar Zeynalov ifadə verib. O, atasının xəstə olduğunu, bu səbəbdən onun nümayəndəsi kimi prosesə qatıldığını açıqlayıb.
Aprelin 5-nə təyin edilən prosesə isə İbrahim Zeynalov özü gəlib. İlqar Zeynalov jurnalistlərə bildirib ki, atası 3 ağrıkəsici iynə vurmaqla prosesə qatılmaq qərarı verib.
İbrahim Zeynalov səhhətindəki problemlərdən, xüsusən ayaqlarındakı ağrılardan əziyyət çəkir. O, məhkəmə binasına bir neçə nəfərin köməyi ilə nimdaş geyimdə, cırılmış qaloşda gəlib.
Prosesin keçirildiyi zal məhkəmənin 2-ci mərtəbəsində yerləşir. İbrahim Zeynalov 2-ci mərtəbəyə çətinliklə, yanındakı şəxsləri qollarından tutmaqla, fasilə verməklə qaldırılıb.
Səhhəti nəzərə alınaraq məhkəmə zalında onun oturaraq ifadə verməsinə şərait yaradılıb.
İbrahim Zeynalov sərbəst ifadəsində ibtidai istintaqa verdiyi ifadəni tam şəkildə təsdiq etdiyini bildirib. Əlavə olaraq deputat Ziyad Səmədzadənin ona qarşı cinayəti sifariş verməkdə ittiham edib: “Deputat Ziyad Səmədzadə ilə uzun illər dost olmuşuq. O, mənim harada nəyim vardısa, hər şeyin canlı şahidi idi. Bilirdi ki, zavodum, fabrikim, sexlərim, evlərim, mülklərim var. Mən heç zaman ağlıma gətirməzdim ki, bu adamdan bir gün təhlükə gələ bilər. Çünki illər boyu Ziyad Səmədzadənin cibxərcliyini, səfərlərinin maliyyələşməsini mən elədim. Qızına torpaq bağışladım, həmin torpaqda inşa edilən evin tikinti materiallarını, kafel-metlaxını, qranit daşlarını Almaniyadan alıb gətizdirdim, hədiyyə elədim. İllərlə toy-yasımız bir olub.
Bir gün də Ziyad Səmədzadə özlüyündə düşünüb ki, mənim biznesimə şərik ola bilər. Belə də eləyib. Mənə deyəndə ki, bizmesinin 49 faizini mənim və ya qızımın adına sənədləşdir, ona cavab verdim ki, Ziyad, bilirsən ki, biznesi uşaqlarıma görə qurmuşam, sənə pay verə bilmərəm. Dedim ki, get işinlə məşğul ol! Ziyad Səmədzadə də dedi ki, bax sənin başına nə oyun açacağam! Heç ağlıma gəlməzdi ki, məni tutdurar, başıma oyun açar. Bu söhbətdən az müddət keçdi, günlərin birində məni MTN-ə sifariş edib tutdurdu”.
Zərərçəkən İbrahim Zeynalov deyib ki, 19 dekabr 2008-ci ildə səhər saat 10 radələrində işə getmək üçün yaşadığı mənzildən çıxmaq istəyərkən qapı döyülüb: “Qapını açanda 2-3 nəfər şəxs özlərini MTN əməkdaşları kimi təqdim edib məni nazirliyə apardılar. Düz Yasin Məmmədovun kabinetinə getdik. O vaxta qədər Yasin Məmmədovu tanımırdım. Elə qapıdan içəri girmişdim ki, barmağı ilə 1 işarəsini göstərib dedi ki, bunu verməsən, səni buraxmayacağıq. Bir nə deməkdir, soruşdum, Yasin yenə barmağını göstərdi. 1 milyon deyirsən, soruşdum. Dedi ki, yox, 10 milyon deyirəm.
Məni MTN-ə aparanlardan birinin adı Nazim idi. O, Yasinin kabinetinə əlində kağız və pul ilə birlikdə gəldi. Dedi, sənin işçin Solmazı gətirmişik, buradadır. Deyir, sənə 1650 manat pul verib, həmin pul əlimdəki puldur. Nazim pulu göstərərək “bu pulu sənin üzərindən aşkar etməyimizi, həmin pulun sənə Solmaz tərəfindən verildiyini sənəddə yazmışıq, götür bu sənədi imzala, narahat olma, hər şey yaxşı olacaq” - dedi.
Yasin Məmmədovla işçisi Nazimin danışığından başa düşdüm ki, bütün bunlar Ziyad Səmədzadənin Eldar Mahmudovla birlikdə başıma açdıqları oyundur. Tutulacağımı başa düşdüyümə görə həmin sənədi imzaladım. Nazim məni iş otağının yanındakı başqa otağa apardı. Səhərə kimi həmin otaqda qaldım. Orada barəmdə cinayət işi başlandı.
Növbəti gün Yasin Məmmədov məni dindirdikdən sonra Səbail rayon Məhkəməsinə apardılar. Orada barəmdə 2 ay müddətinə həbs qəti-imkan tədbiri seçildi. Ertəsi gün Mövlam Şıxəliyev məni xidməti otağında qəbul etdi. Həmin otaq 6-cı mərtəbədə Yasin Məmmədovun otağı olan dəhlizdə yerləşir. Aralarında təxminən 3-4 otaq var.
Məni Mövlam Şıxəliyevin otağına Yasin Məmmədov apardı. Görüş zamanı Mövlam Şıxəliyev məni qanunsuz işlər görməkdə ittiham elədi. Məni hədələdi və Yasin Məmmədova işi ciddi istintaq etməyi tapşırdı. Bundan bir neçə gün sonra Yasin Məmmədov məni otağına gətizdirib sağ əlinin şəhadət barmağını göstərərək “sən burada qalmalı adam deyilsən, bunu ver, çıx get evə” dedi.
Yasin Məmmədovun məndən 1 milyon dollar pul istədiyini fikirləşirdim. Yasinə “məni burax, axşama kimi pulu gətirib verim sənə” dedim. Lakin Yasin “sən, deyəsən, məni başa düşmədin, nə 1 milyon?! 10 milyon dollar, əgər pulu verməsən sənə köməklik edilməyəcək” dedi. Bu qədər məbləğdə pul düzəltmək mümkün olmadığını, hələlik 2 milyon manat pul verə biləcəyimi dedim. Qalanını da azadlığa çıxandan sonra hissə-hissə düzəldərək verməyi təklif elədim. Yasin Məmmədov bununla razılaşmadı.
Sonrakı günlərdə də Yasin Məmmədov məni tez-tez otağına gətizdirir, 10 milyon dollar tələb edirdi. Vəkilim vasitəsi ilə oğlum İlqara “məndən 10 milyon dolları pul istəyirlər, əmlaklarımızı sat, pulu ver, burada qala bilmirəm” məzmunlu məktub yazdım. İlqar da xəbər göndərdi ki, “artıq evin birini satmışıq, bütün əmlakları satışa çıxarmışıq, darıxma, pul düzəldirik”.
Növbəti dəfə təxminən 15 gün sonra Mövlam Şıxəliyevin otağına apardılar. Mövlam Şıxəliyev Yasin Məmmədovun yanında mühasibim Qüdrətlə maraqlandı. Yasin otaqdan çıxan kimi Mövlam Şixəliyev Qüdrətin buraxılmasına görə Yasin Məmmədova nə qədər pul verdiyimi soruşdu. Dedim ki, Qüdrətə görə 50 min manat vermişəm. Bundan sonra Mövlam Şixəliyev Qüdrəti tutmayacaqlarını və onun işinin də həllinə görə kömək edəcəyini dedi.
Bu görüşdən təxminən 15-20 gün sonra Yasin Məmmədov məni yenə Mövlam Şıxəliyevin otağına apardı. Mövlam Şıxəliyev əvvəlki görüşlərdən fərqli danışdı. Bir az mülayim, səmimi söhbət elədi, Ziyad Səmədzadə ilə aramızdakı münasibətləri dəqiqləşdirdi.
2009-cu ilin mart ayında, Novruz bayramına 3-4 gün qalmış qardaşım Məzahim Zeynalovla MTN-nin binasında görüş təşkil etdilər. Məzahim mənə “darıxma, nəyimiz var, hamısını satırıq, pulu düzəldəcəyik” dedi. Bir neçə aydan sonra məni Penitensiar Xidmətin Müalicə Müəssisəsinə etap etdilər. Bir qədər orada qaldıqdan sonra, 2009-cu ilin iyul ayında MTN-nin İstintaq Təcridxanasına qaytardılar. Elə həmin gün Yasin Məmmədov məni öz otağına gətizdirdi. Dedi ki, oğlun İlqar 8 milyon dollar pul verdi, səni buraxıram, amma çağıranda gələrsən.
Penitensiar Xidmətin Müalicə Müəssisəsindən qayıdan gün Yasin Məmmədov məni Mövlam Şixəliyevin otağına apardı. Mövlam Şixəliyev səhhətimlə maraqlandı. O da dedi ki, oğlun İlqar Zeynalovun hər şeyi həll etdi. Lakin məni buraxa bilmədiklərini, yaxın günlərdə Eldar Mahmudovun qəbuluna düşən kimi məruzə edib, məni buraxacağını bildirdi”.
Zərərçəkmişin sözlərinə görə, növbəti dəfə Mövlam Şixəliyevlə ev dustaqlığına çıxan gün görüşüb: “Həmin gün Mövlam Şıxəliyev Yasin Məmmədovun otağına gəldi, dedi ki, sənədləri tez hazırla, burax, tez-tez çağırarsan. Məni buraxdıqları gün Solmaz da İstintaq Baş İdarəsində idi. O da dedi ki, məni buraxacaqlar, bu münasibətlə məni təbrik etdi. Həmin dövrdə heç bir ağır xəstəlikdən əziyyət çəkmirdim. Yasin Məmmədov isə “səni ağır xəstəliyinlə əlaqədar olaraq həbsdən azad edirəm” dedi”.
İbrahim Zeynalov bildirib ki, oğlu, qızı, həyat yoldaşı evlərində aparılan qanunsuz axtarışlar zamanı qorxu-həyəcan keçiriblər: “Qızımın da, oğlumun da, özümün də evlərimizdə axtarış aparıb, qızıl-brilyant, pul axtarıblar. Divarları “laqonda” ilə kəsib-doğrayıblar, parket döşəmələri söküb seyf axtarıblar. Qızım bu hadisə zamanı həyəcan keçirdi, qorxdu. Xəstəlik tapdı, yataq xəstəsi oldu.
Oğlum, ardınca da qızım dünyasını dəyişdilər. Həyat yoldaşım da uşaqlarımızın ölümünə dözmədi, o da həyətdan getdi. Bu adamlar mənim həyatımı alt-üst etdilər. Heç nəyim qalmadı. İllərdir ki, Neftçalada vaqonda yaşayıram”.
İbrahim Zeynalov prosesdə kövrəlib, buna görə də vəziyyəti pisləşib. Ona su verib, yardım göstəriblər.
Bir neçə dəqiqəlik sükutdan sonra İbrahim Zeynalov baş verənlərə görə Yasin Məmmədovu lənətləyib. Bu zaman Yasin Məmmədov ayağa qalxaraq İbrahim Zeynalovun üstünə qışqırmaqla ona tərəf yeriyib. Məhkəmə zalında qovğa düşüb. Digər zərərçəkənlər də Yasin Məmmədovun üzərinə yeriyiblər. Ondan geri oturaraq səsini kəsməsini tələb ediblər. Yasin Məmmədov yerinə oturub. Hakim Elbəy Allahverdiyev Yasin Məmmədova xəbərdarlıq edib.
Zərərçəkən Hüseyn Səfərov hakimi tərəf tutmaqda ittiham edib: “Bunlara bu şəraiti yaradan sizsiz. Siz bunların tərəfini tutursuz. Məhkəməni birtərəfli aparırsız. Hakimliyə layiq olmayan hərəkətlərə yol verirsiz. Dövlətin əsaslarını sarsıdırsız. Yasin Məmmədov da həbsdə olmalıdır. Azadlıqdadır deyə zərərçəkənlərə gözünüzün qabağında hədə-qorxu gəlir, səsinizi çıxarmırsız. Biz danışmasaq, sizdən reaksiya yoxdur”.
Hakim Elbəy Allahverdiyev Hüseyn Səfərovu məhkəmə zalından çıxarıb.
Bundan sonra zərərçəkən Zaur Əliyev İbrahim Zeynalova bir neçə sual verib. İbrahim Zeynalov deyib ki, onu sırf mal-mülkünün əlindən alınmasına görə qanunsuz olaraq həbsə alıblar: “1650 manat rüşvəti polis və ya uzağı prokurorluq araşdıra bilərdi. Bu məsələnin MTN-ə heç bir aidiyyəti yox idi. Çünki rüşvət məsələsi də yox idi. Mənim həbsimi Ziyad Səmədzadə sifariş edib, bunlar da mal-mülkümü əlimdən almaq üçün bir ittiham uydurub məni həbs etdilər. Məni faktiki olaraq girov götürüblər. 7 ay 17 gün girov saxlayıblar”.
İbrahim Zeynalovun bu sözlərinə Mövlam Şıxəliyev belə reaksiya verib: “Bu məsələnin araşdırılması xüsusi tapşırıqla bizə həvalə olunmuşdu. Xüsusi nəzarətdə idi. Mən indi həmin adamın adını çəkə bilmirəm. Çünki səhər mətbuatda çıxacaq. Vaxt gələr, zaman gələr, açıb deyəcəyəm. Bu işə prokurorluğun da xüsusi nəzarəti olub”.
Yasin Məmmədov da İbrahim Zeynalovla əlaqəli işi prosessual qaydalara uyğun araşdırıldığını deyib.
Bundan sonra İbrahim Zeynalovun yaxınları şahid qismində ifadə veriblər. Onlar İbrahim Zeynalovun qanunsuz həbsindən sonra övladlarının, qardaşının evlərini, əmlaklarını sataraq 8 milyon dollar düzəltdiklərini və aparıb MTN-ə verdiklərini təsdiq ediblər.
Növbəti proses aprelin 12-də davam edəcək.
İttihama görə, Mövlam Şixəliyev İstintaq Baş İdarəsinin rəisi vəzifəsində çalışdığı 2008-2014-cü illərdə qeyd edilən qurumun tərkibindəki şöbənin sabiq rəisi Vüsal Ələkbərov, İbtidai istintaq idarəsinin sabiq rəis müavini Yasin Məmmədov, şöbə rəisinin sabiq müavini Sahib Ələkbərov ilə mütəşəkkil dəstə tərkibində iş adalarından hədə-qorxu yolu ilə külli miqdarda pul tələb ediblər.
İstintaqla Mövlam Şixəliyevin mütəşəkkil dəstə halında ümumilikdə 14 milyon 292 min manat məbləğində pul vəsaitini rüşvət qismində, 5 milyon 77 min manat məbləğində özgə əmlakını hədə-qorxu ilə tələb edib almasına, həmçinin səlahiyyət həddini aşması və sübutları saxtalaşdırmasına əsaslı şübhələr müəyyən edilib.
Mövlam Şixəliyevə Cinayət Məcəlləsinin 182.3.1, 182.3.2 (külli miqdarda əmlak əldə etmək məqsədi ilə mütəşəkkil dəstə tərəfindən hədə qorxu ilə tələb etmə), 294.3 (sübutları saxtalaşdırma), 311.3.1 (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma) və digər maddələri ilə ittiham elan edilməklə barəsində məhkəmənin qərarı ilə həbs qətimkan tədbiri seçilmiş, Vüsal Ələkbərov, Yasin Məmmədov və Sahib Ələkbərov həmin Məcəllənin 311.3.1, 341.2.1, 341.2.3-cü (vəzifə səlahiyyətlərindən sui-istifadə və ya vəzifə səlahiyyətlərini aşma) və digər maddələri ilə təqsirləndirilən şəxs qismində cəlb edilməklə barələrində müvafiq qətimkan tədbirləri seçilib.
Dəstə üzvlərinin qanunsuz əməllərindən iş adamları Qurbanov Mehrac Qurban oğlu, Cəfərov Etibar Vahid oğlu, Qurbanov Akif Teymur oğlu, Abdullayev Orxan Elman oğlu, Hacıyev Cavidan Mustafa oğlu, Musayeva Railə Rafkat qızı, Əliyev Kəramət Etibar oğlu, Əliyev Zaur Ağahüseyn oğlu, İsmayılov Afət Davud oğlu, Rəşidov Azad Niyazi oğlu, Səfərov Hüseyn Nəriman oğlu, Salahov Müsənnif Hilal oğlu, Seyidov Ceyhun Mahmud oğlu, Mirzəyev Əhməd Məhəmməd oğlu, İsmayılov Sərdar Əhməd oğlu, Əliyev Elvar Layıq oğlu, Nəcəfov Seyran Burhan oğlu, Kərimov Rauf Faiq oğlu, Bağırov Qulam Davud oğlu, Baloğlanov Qüdrət Baloğlan oğlu, Zeynalov İbrahim Məhəmməd oğlu, Həsənov Rauf Qasım oğlu, Əliyev Ələddin Hüseyn oğlu, Heydərov Anar Sadıx oğlu, Sultanov Bahəddin Abdulla oğlu, Mədətov Elşən İsmayıl oğlu, Ağamalıyev Ağasalam Mövlud oğlu, Rzayev Namil Heydər oğlu, Əliyev Etibar Mahmud oğlu, Kazımov Nizami Firudin oğlu, Həsənəliyev Əfsəl Xanlar oğlu və Bayramova Esmira Məcid qızı zərərçəkiblər.
Cinayət işi üzrə 32 zərərçəkmiş var.
