Sutkası 30 manata parkinq “xidməti“: ADY-dən biabırçı addım



 19:17 26.03.2024     247

“Azərbaycan Dəmir Yolları” QSC metronun 28 May stansiyasının yaxınlığında, Bakı Dəmiryolu Vağzalının ətrafında yeni parkinq xidməti yaradıb.

Demedia.az xəbər verir ki, parkinqdən istifadə qiymətləri sürücülər arasında şok effekti yaradıb. Azparkinqlə müqayisədə ADY-nin tələb etdiyi xidmət haqqı qat-qat yüksəkdir və bu, sosial şəbəkələrdə ciddi tənqidlə qarşılanıb. Təkcə onu qeyd etmək kifayətdir ki, sözügedən parkinq ərazisində bir sutka avtomobil saxlamağın qiyməti 30 AZN-dir. Tutaq ki, ADY-in hər hansı əməkdaşı iş saatı müddətində ərazidə 8 saatlıq xidmətdən istifadə etsə 18 AZN ödəməlidir. Yəni ay sonunda ASC-dən aldığı maaşı qaytarıb elə ADY rəhbərliyinin cibinə qoymalıdır...

Qurum tərəfindən tənqidlərə cavab verilib. “Azərbaycan Dəmir Yolları” QSC-nin İctimaiyyətlə əlaqələr şöbəsinin müdiri Sənubər Nəzərova   "APA-Economics"ə açıqlamasında deyib ki, Bakı Dəmiryol Vağzalının Süleyman Rəhimov küçəsi ilə Mirəli Qaşqay küçəsinin kəsişməsində (“28 May” metro stansiyasının yuxarı hissəsi) yerləşən avtomobil parklanma ərazisi vağzala gələn sərnişinlərin qarşılanma və yola salınma zonası kimi fəaliyyət göstərəcək.

O bildirib ki, ərazi sırf sərnişinlərin qarşılanması və yola salınması zonası olduğu üçün avtomobillərin ilk 15 dəqiqə ərzində ödənişsiz park edilməsinə şərait yaradılıb: "Dəmiryolundan istifadə edənlərin vağzal ərazisinə avtomobillə giriş və çıxışını, o cümlədən sərnişin məmnuniyyətini təmin etmək baxımından 15 dəqiqə ödənişsiz vaxt müddəti təyin edilib."

Tariflərin yüksək olması ilə bağlı iradlara gəlincə, Sənubər Nəzərova qeyd edib ki, sözügedən zona ilk növbədə qatarlardan istifadə edən sərnişinlərin vağzal ərazisinə rahat daxil olması üçün nəzərdə tutulub. Ona görə də 15 dəqiqədən artıq digər məqsədlərlə ərazidə avtomobil saxlamaq istəyənlər müəyyən edilən tariflərə uyğun avtomobillərini parkinq edə bilərlər".

S.Nəzərova, həmçinin qeyd edib ki, sözügedən zonada avtomobillərin sutkalıq saxlanılması arzuedilən deyil, çünki uzunmüddətli parklama ərazinin əsas təyinatı olan ADY sərnişinlərinin rahat gəlib gedişinə maneə törədir:

"Nəzərə alsaq ki, ADY-na məxsus qatarlardan gündəlik olaraq 30 mindən çox sərnişin istifadə edir ilk növbədə sərnişinlərimizin Bakı Dəmiryol Vağzalının xidmətlərindən rahat istifadə etmələri və parkinq ərazisinə manesiz daxil olmaları üçün şərait yaradılacaq."

S. Nəzərova onu da xatırladıb ki, vağzal ətrafında uyğun qiymətlərlə fəaliyyət göstərən "Azparkinq" yerüstü və yeraltı dayanacaqları sürücülərin xidmətindədir.