Putin İlham Əliyev və Nikol Paşinyanla birgə bəyanatın razılaşdırıldığını bildirib
Rusiya Prezidenti Vladimir Putin bildirib ki, Soçidə Azərbaycan Prezidenti İlham Əliyev və Ermənistanın baş naziri Nikol Paşinyanla üçtərəfli görüş iki saatdan çox davam edib.
Bu barədə Demedia.az- TASS-a istinadən xəbər verir.
"Bu gün biz birgə bəyanatı razılaşdırdıq. Açığını demək lazımdır ki, hər şey razılaşdırılmayıb, bəzi şeylər əvvəllər mütəxəssislər səviyyəsində işlənmiş mətndən çıxarılmalı idi", - Rusiya dövlətinin başçısı qeyd edib.
Rusiya Prezidenti üçtərəfli görüşün iki saatdan çox davam etdiyini bildirib. "Əvvəlcə Ermənistanın nümayəndə heyəti ilə, sonra isə Ermənistanın baş naziri ilə üz-üzə. Sonra Azərbaycan nümayəndə heyəti ilə və Azərbaycan Prezidenti ilə danışdıq. Sonra iki, hətta, yəqin ki, bir az da çox üçtərəfli danışdıq”, - Rusiya lideri bildirib.
"Ümumi fikrimizcə, bu, çox faydalı görüş oldu", - Putin vurğulayıb.
Putin bildirib ki, Rusiya Federasiyası Ermənistan və Azərbaycan arasında yekun nizamlanmaya nail olmaq üçün hər şeyi edəcək.
