Tərtərdə yağış təsərrüfatlara ciddi ziyan vurdu
Qeyri-sabit hava şəraiti Qarabağ bölgəsində də müşahidə olunub.
Demedia.az EL TV-yə istinadən xəbər verir ki, Tərtər bölgəsinə güclü dolu yağıb.
Daha sonra leysan yağışa çevrilib. Bir neçə dəqiqə aramsız yağan yağış rayonun İsmayılbəyli, Qarağacı, Yuxarı Qapanlı, Qaynaq, Dəmirçilər kəndlərinə düşüb. Nəticədə meyvə bağlarına və əkin sahələrinə ziyan dəyib. Güclü yağış səbəbilə yaranan daşqın rayonun Dəmirçilər kəndində fərdi təsərrüfatlara ziyan vurub. Kənd sakinlərinin bildirdiyinə görə, kəndin 250 fərdi təsərrüfatından yarısı su altında qalıb. Əkin sahələrindan başqa evlərin zirzəmiləri və tövlələr də su ilə dolub. Sel sularının yaratdığı gölməçələr səbəbindən sakinlər evlərinə girməkdə çətinlik çəkiblər. Suyun çəkilməsi üçün əraziyə ağır texnikalar cəlb edilib.
Tərtər Rayon İcra Hakimiyyətindən verilən məlumata görə, rayonun Dəmirçilər kəndində vətəndaşlara məxsus 70 fərdi yaşayış evinin həyətini su basıb, 16 hektar buğda, 15 hektar arpa, 3 hektar pambıq, 5 hektar günabaxan, 30 hektar yonca sahəsinə ağır və orta dərəcədə ziyan dəyib. Ağkənd kəndində isə vətəndaşlara məxsus 40 fərdi yaşayış evinin həyətini su basıb, 23 hektar buğda, 25 hektar arpa, 7 hektar günabaxan, 20 hektar yonca sahəsinə ağır və orta dərəcədə ziyan dəyib.
