Zirəddin Rzayev: "2024 - təbii fəlakətlər ilidir

"2024 - xəstəliklər ili olacaq".

Bu sözləri Oxu.Az-a müsahibəsində Moskvada yaşayan azərbaycanlı ekstrasens Zirəddin Rzayev deyib.

Müsahibəni təqdim edirik:

- Zirəddin bəy, necəsiniz, işləriniz necə gedir?

- Təşəkkür edirəm, hər şey qaydasındadır.

- 2023-cü illə vidalaşmağımıza sayılı günlər qalır. Hər kəsi maraqlandıran bir sual var: 2024-cü ildə bizi nələr gözləyir?

- Bu il texniki və tibbi tərəqqiyə nail olacağıq. Böyük elmi kəşflər ediləcək. Pis tərəfi odur ki, təbii fəlakətlər daha çox olacaq. Bir sözlə, 2024 - təbii fəlakətlər ilidir.

- Müşahidə etmisinizsə, yola saldığımız ildə dəhşətli zəlzələlər çox oldu. Növbəti ildə də davam edəcəyini bildirirlər. Siz nə düşünürsünüz?

- Bəli, gələn il də tektonik hərəkətli il olacaq. Sadəcə, bunu deyə bilərəm.

- 2020-ci ildən bu günə qədər bütün dünya koronavirus epidemiyası ilə qarşı-qarşıyadır. Hazırda vəziyyət nisbətən normallaşıb, hətta pandemiya səviyyəsindən epidemiya səviyyəsinə endirilib. 2024-cü ildə xəstəliklə vidalaşa bilərikmi?

- Koronavirus ilə bağlı məlumatı mən 2017-ci ildə demişdim. Hətta o vaxt demişdim ki, "payızın əvvəlində dəhşətli virus dünyanı cənginə alacaq. İnsanlar maskada gəzməli olacaqlar". Elə də oldu. 2024-cü il də xəstəliklər ilidir. Yeni, fərqli viruslar özünü büruzə verəcək.

- Son bir ayda ölkəmizdə qızılca xəstəliyi geniş yayılıb. Ölüm hallarına rast gəlinir. Yeni ildə xəstəlik səngiyəcəkmi?

- Qızılca xəstəliyindən elə də böyük təhlükə görmürəm. Hazırda xalq arasında təşviş var. Böyük fəlakətə səbəb olacağını düşünmürəm.

- 2024-cü il ilə bağlı dünya alimləri çox bədbin fikirlər səsləndirirlər. Fəlakətlərin çoxalacağını dilə gətirirlər. Siz nə düşünürsünüz?

- Dünya alimləri indi deyirlər, mən isə hələ üç-dörd il öncə demişdim. Dünyanın özünü Allah su ilə təhdid edir. 2024-cü ildə daha çox vulkan püskürməsi, asteroid fəlakəti gözlənilir.

- Gələn ilin daha nə kimi özəlliyi olacaq?

- 2024-cü ilin elə də böyük bir özəlliyi yoxdur. Yaxşı tərəfi - texniki, hərbi, tibbi sahələrdə inkişaf olacaq. Ümumilikdə 2024-cü rahat il deyil.

- Zodiak üzrə Əjdaha ilidir. İlinə xas olaraq "Əjdaha" alovunu daha çoxmu püskürəcək?

- Bu ilin "əjdahası" dəlisovdur. İl Dəli Əjdaha ilidir. O, uşaq xarakterli, emosional və çılğındır.

- Hansı ölkələrin problemləri daha çox olacaq?

- 2024-cü il MDB üzvləri və Orta Asiya ölkələri üçün elə də uğurlu olmayacaq. 2024-25-ci illərdə Avropa qitəsində böyük təbii fəlakətlərin olma ehtimalı çox böyükdür.

- Qarşıdan gələn ildə inflyasiya gözlənilirmi?

- 2024-cü ildə inflyasiya olmayacaq. Elə bir şey yoxdur. Bəzi iqtisadçı və siyasətçilərin təkidli proqnozlarına rəğmən, böyük inflyasiya yaşanmayacaq.

- Əjdaha ili ümumən bizə nə vəd edəcək?

- Əjdaha ili bizə mehriban olmağı tövsiyə edir. Çünki "Əjdaha" uşaq xarakterlidir. Emosionaldır. İnsanlar tez küsə, dalaşa bilərlər, aralarında münaqişə yarana bilər. Dövlətlər arasında yaşanacaq münaqişələr də Əjdaha ilinin xarakterinə görə istisna deyil.

- Rusiya və Ukrayna arasında münasibətlər necə olacaq?

- Bu hərbi qarşıdurmada Rusiya qalib gələcək. Rusiyanın Ukrayna, NATO, Avropa və ABŞ üzərində qələbəsi gözlənilir. Bu, son deyil. Çünki Rusiya və ABŞ qarşıdurması illərlə davam edəcək. Amma Rusiya nə ABŞ-yə, nə Avropaya, nə də NATO-ya məğlub olacaq.

- Yaxın Şərqdə yeni münaqişə ocaqları olacaqmı?

- Yaxın Şərqdə yeni savaş qığılcımları özünü göstərəcək. Bununla yanaşı, Fələstin-İsrail gərginliyi sonuncunun qələbəsi ilə bitəcək.

İran daxilində yenə yayın əvvəli və ortalarında münaqişə yaranacağı, ictimai sabitliyin pozulma ehtimalı çox böyükdür.

- 2024-cü ildə qida çatışmazlığı barədə proqnozlar var. Siz nə deyə bilərsiniz?

- 2024-cü ildə qida çatışmazlığı olacağını öncədən söyləmişdim. Düzdür, Afrikadakı kimi olmayacaq. Ümumiyyətlə, aclıq ili olmayacaq, sadəcə, qida məhsullarında müəyyən qıtlıq olacaq.

- Yola saldığımız ili necə qiymətləndirərdiniz?

- Geridə qoyacağımız 2023-cü il çox aqressiv, gərgin il oldu.

- 2023-cü il ilə bağlı gözləntilərinizin hər biri oldumu?

- 2023-cü il üçün söylədiklərim 99 faizi özünü doğrultdu. Bunlardan biri Türkiyədə baş verən zəlzələ idi. Azərbaycanda da zəlzələ olacağını demişdim. Mən Türkiyədəki prezident seçkisini də demişdim.

2024-26-cı illərdə bizə qonşu olan iki ölkənin prezidentlərinin səhhətlərində ciddi problem olacaq.

- Zirəddin bəy, gələn il hansı məşhurlar təhlükədədirlər?

- Məşhurlar ilə bağlı proqnoz vermək istəmirəm.