Siyasi partiya sədrləri Ağalı kəndi ilə tanış oldu
Ölkəmizdə fəaliyyət göstərən siyasi partiyaların rəhbərləri və bir qrup politoloq iyunun 24-də Zəngilana səfər ediblər.
Demedia.az xəbər verir ki, Azərbaycan Respublikası Prezident Administrasiyasının təşkilatçılığı ilə həyata keçirilən səfərin məqsədi Zəngilan rayonunda aparılan bərpa-quruculuq layihələri ilə yaxından tanış olmaqdır.
Sayca 4-cü olan birgə səfərin ünvanı Zəngilan rayonudur. Təşkil olunan səfərdə 40 siyasi partiyanın 46 nümayəndəsi, həmçinin 6 tanınmış politoloq, siyasi şərhçi və 19 jurnalist də iştirak edir.
***
Azərbaycanda fəaliyyət göstərən siyasi partiyaların rəhbərləri və bir qrup politoloqun Zəngilan rayonuna səfəri başa çatıb.
Onlar əvvəlcə Həkəri çayına balıq buraxılma mərasimində iştirak ediblər.
Partiya sədrləri prosesə qoşularaq çaya balıq buraxıblar. Ekologiya və təbii sərvətlər nazirinin müavini Firdovsi Əliyev səfər iştirakçılarına Həkəri çayı və bu ərazilərin flora və faunası haqqında məlumat verib. Buraxılan balıq növləri barədə səfər iştirakçılarını məlumatlandırıb. O, Həkəri çayına 3 min balığın buraxıldığıni bildirib.
Sonra iştirakçılar “Böyük qayıdış”ın rəmzi olan rayonun Ağalı kəndində “Ağıllı kənd” layihəsi ilə tanış olublar. Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev burada yaradılan şərait, o cümlədən “Yaşıl enerji” layihələri çərçivəsində görülmüş işlərlə bağlı geniş məlumat verib.
Daha sonra partiya sədrləri Bəsitçay Dövlət Təbiət Qoruğunu ziyarət ediblər. Bununla da ölkəmizdə fəaliyyət göstərən siyasi partiyaların rəhbərləri və bir qrup politoloqun Zəngilan rayonuna səfəri başa çatıb.
