Meyiti tapılan 5 gəncdən ikisi bu universitetin tələbəsi imiş
Fevralın 23-də saat 14 radələrində Bakı şəhəri, Səbail rayonu, Badamdar qəsəbəsi, 1-ci yaşayış massivinin 1-ci döngə ev 29 ünvanında yerləşən fərdi yaşayış evində meyiti aşkarlanan 5 nəfərdən daha biri, Şikar İdris oğlu Allahverdiyev də Azərbaycan Texniki Universitetinin (AzTU) tələbəsi olub.
Nexeber.az axar.az-a istinadən xəbər verir ki, bu barədə universitetin mətbuat xidmətinin rəhbəri Sevinc İsgəndərova bildirib.
O qeyd edib ki, Ş.Allahverdiyev Energetika və avtomatika fakültəsinin II kurs əlaçı magistrantı olub:
"Şikar Allahverdiyev ali təhsilin bakalavriat səviyyəsini də AzTU-da fərqlənmə ilə bitirmişdi. Universitetin rəhbərliyi və kollektivi Şikar Allahverdiyevin vəfatından kədərləndiyini bildirir, ailəsinə və yaxınlarına dərin hüznlə başsağlığı verir".
Qeyd edək ki, 5 nəfərdən biri, Lətif Rəşad oğlu Əliyev da AzTU-nun İnformasiya və telekommunikasiya texnologiyaları fakültəsinin I kurs tələbəsi olub. Lətif Əliyev AzTU-nun nizam-intizamlı tələbələrindən olub, dərslərini yaxşı oxuyub. O, sonuncu dəfə ölümündən bir gün öncə onlayn dərslərdə iştirak edib.
