Kaktusun inanılmaz faydaları - Araşdırma
Kaktuslar səhra bitkisi sayılır.
Artıq elmə məlumdur ki, onlara səhrada yaşamaq imkanı verən özlərində bol miqdarda su saxlamaq qabiliyyətləridir. Kaktus suyu qədimdən bəri, yerli əhali tərəfindən tibbi və kosmetoloji məqsədlərlə istifadə edilib. Kaktus suyundakı elektrolit səviyyəsi normal su ilə müqayisədə çox yüksəkdir. Bu da o deməkdir ki, kaktus suyu insan dərisini ultrabənövşəyi şüalardan qoruyur. Eyni zamanda, kaktus suyu antibakterial xüsusiyyəti sayəsində dərinin regenerasiyasını təmin edir, sızanaq və səpkilərin əmələ gəlməsinin qarşısını alır. Əgər varsa, onları qısa zamanda yox edir.
İnsanlıq qədim ənənələrin dəyərini anladıqca, kaktus da gözəllik dünyasında özünə taxt qurmağa başladı. Son zamanlarda mağazalarda kaktuslu şampunlara, yəqin ki, rast gəlmisiniz. Kaktusun tərkibindəki yağ turşuları iltihab əleyhdarıdır. Araşdırmalar zamanı məlum olub ki, kaktusdakı yağ turşuları baş dərisindəki istənilən iltihablanmanın qarşısını alır. İltihabdan yaxa qurtarmış baş dərisində isə kəpək əmələ gəlmir.
Kaktuslu şampunla yuyulan saçlar daha parlaq və daha zərif olur. Həmçinin, kaktus saçları təmizləyərkən, saçlara zərər vermir, əksinə, saçın strukturundakı bütövlüyü qoruyur. Tərkibindəki vitaminlərlə hüceyrələrin yenilənməsinə öz töhfəsini verən kaktuslu şampun fol turşusu ilə də zəngindir. Fol turşusunun saç tökülməsinin qarşısını aldığı da elmi araşdırmalar nəticəsində aşkarlanıb.
Kaktuslu şampun kaktus yağı baxımından da zəngindir. Kaktus yağı saçqıran dediyimiz halın baş verməsinin qarşısını almaqda mahirdir. Eyni zamanda, kaktus yağı saçların uzanmasına da müsbət təsir göstərir. Dəfələrlə boyanmış, öz original materialını itirmiş saçların xilaskarı da kaktus yağlarıdır.
Bahadur Seyidov / Demedia.az
