Fransaya təsir edə biləcək ən böyük addım... - İqtisadçı açıqladı
Fransa senatının qəbul etdiyi mənasız, hüquqa zidd sənədinə Azərbayacan sərt reaksiya verməlidir, amma populizmə yuvarlanan açıqlamalar, mövqelər də görürəm, istərdim ki, məntiqə, rəqəmlərə söykənən yanaşma və atılacaq addımların düşünülmüş alqoritmi olsun.
Demedia.az xəbər verir ki, bunu iqtisadçı Natiq Cəfərli deyib.
O bildirib ki, bu ilin ilk 9 ayında Azərbaycan Fransaya cəmi 48 mln.691 min dollarlıq mal-məhsul (əsasən neft) ixrac edib – ölkənin həmin dövrdə ixracının cəmi 0,16%-dir:
"Eyni dövrdə Fransa Azərbaycana 170 mln. 182 min dollarlıq mal-məhsul ixrac edib ki, bu da ölkəmizin idaxalının cəmi 1,65%-dir. Yəni, biz Fransaya mal satmamaq, ordan da mal almasaq heç bir təsiri olmayacaq. 2021-ci ildə Fransanın ümumi ixracı 585 mlrd. dollar olub, indi Azərbaycan 200 mln. dollar mal almasa nə olacaq?! Heç nə, hətta biz onlara 50 mln. dollarlıq neft satmasaq da Fransaya heç bir təsiri olmayacaq,
- Fransaya təsir edəcək məsələlərdən biri Azərbaycanda çalışan Fransız şirkətləridir – bu ölkənin 300-ə yaxın şirkəti məmləkətdə işləyir. Aralarında “Alstom”, “Thales”, “Schneider-Electric”, “Suez”, “Technip”, “Total”, “Lafarge-Holcim” (bu şirkət daha çox İsveçrəyə bağlıdır) kimi tanınmış, öz lobbi qrupları olan, Fransa siyasətinə təsir edə biləcək şirkətlər də var. Azərbaycan hökuməti həmin şirkətləri dəvət edib onlarla danışmalı, onların Fransa siyasətinə təsir mexanizmlərindən istifadə etməyi öyrənməlidir – hamımız bilirik ki, hökumət iqtisadiyyatı normal idarə etməyi bilməsə də, şirkətlərlə sərt danışmağı yaxşı bacarır,
- Biz nə etsək də, Fransanın mövqeyini kökündən dəyişə bilməyəcəyik, bunun obtektiv-subyektiv səbəbləri var – ona görə də, Azərbaycan hökuməti özünü və bizi aldadıb, güya, “Fransa mövqeyini dəyişəcək”, adıyla həmin ölkədə kilsə-muzey, park təmirindən vaz keçib milyonlar xərcləməyi dayandırmalıdır. Bu yol işləmir, hökuməti, “hər şeyi pulla həll edərik”, yanaşması Fransada çalışmır-çalışmayacaq,
- Fransaya təsir edə biləcək ən böyük addımlardan biri isə bu ölkənin dünyanın müxtəlif bölgələrində digər ölkələrlə rəqabəti zamanı rəsmi Parisin rəqiblərini dəstəkləməkdir – Fransaya təmirə milyonlar xərcləməkdənsə, rəsmi Parisin rəqiblərinə Afrika, Asiya ölkələrində milyonlar xərcləmək daha məntiqlidir, özü də ki, dünyanın bu bölgələrində Fransanın açıq-gizli rəqibi həmişə Böyük Britaniya olub, niyə də ingilis dostlarımızı daha yaxından dəstəkləməyək?!
Xülasə, emosiyaları, populizmi kənara qoyub ağılla-məntiqlə, peşəkarlıqla bu mövzularda düşünmək, qərarlar almaq və davranmaq lazımdır...".
Xəyalə Məmmədova / Demedia.az
