Azərbaycan millisinin skautu: Emil Mustafayevin yığmamıza çox xeyri dəyəcək



 13:07 27.03.2024     225

Emil Mustafayevin yığmamıza çox xeyri dəyəcək. Təbii ki, klubunda müntəzəm oynaması da vacibdir.

Bunu Demedia.az-a açıqlamasında futbol üzrə Azərbaycan millisinin skautu İlqar Qurbanov “FIFA series - Edition 2024” layihəsində Monqolustanla keçirilən oyunda yığmada debüt edən Emil Mustafayevlə bağlı danışarkən deyib.

AFFA rəsmisi Ukraynanın “Polesya” klubunun 22 yaşlı yarımmüdafiəçisinin milliyə cəlb olunmasında qurumun baş katibi Sərxan Hacıyevin böyük rol oynadığını bildirib: “Üç ildən çoxdur ki, Emil Mustafayevi izləyirəm. Onu milliyə gətirmək bir az çətin oldu. Çünki Ukrayna Futbol Assosiasiyası da futbolçunu yığmaya çağırmaq istəyirdi. Üstəlik, ölkədən çıxmaq problem idi. Bu məsələnin həllində AFFA-nın baş katibi Sərxan Hacıyevin böyük rolu oldu. O, Emilin formasını geyindiyi “Polesya” klubunun prezidenti ilə birbaşa əlaqə saxlayaraq, bunun reallaşması üçün çox çalışdı”.

İ.Qurbanov gənc futbolçunun böyük potensiala malik olduğunu söyləyib: “Emilin debütü pis alınmadı. İlk matçı olmasına baxmayaraq, yaxşı təsir bağışladı. Ancaq potensialı yüksəkdir, daha yaxşı oynaya bilər. Millimizin əvvəlki baş məşqçisi Canni De Byaziyə tez-tez Mustafayevi təklif edirdim. Təəssüf ki, çağırmırdı. Buna rəğmən, Emili gətirməyə müvəffəq olduq”.

Qeyd edək ki, Emil Mustafayev Monqolustanla (1:0) oyunda 59-cu, Bolqarıstanla (1:1) görüşdə isə 62-ci dəqiqədə meydana daxil olub. Hər iki qarşılaşma Tofiq Bəhramov adına Respublika stadionunda keçirilib.