"Real Madrid"in futbolçusu "Mançester Yunayted"ə keçir
İngiltərənin "Mançester Yunayted" klubu İspaniya "Real"ı ilə futbolçu Kazemironun transferinə dair razılıq əldə etdiyini açıqlayıb.
Demedia.az-ın məlumatına görə, artıq braziliyalı yarımmüdafiəçinin keçidi onun müqavilə şərtləri, tibbi baxış və vizasını rəsmiləşdirməsindən asılıdır. 30 yaşlı oyunçu üçün "kral klubu" 60 milyon avro alacaq. Daha 10 milyon avro isə bonus kimi ödənilə bilər.
Braziliya "San Paulu"sunun yetirməsi olan futbolçu Madrid klubuna 2013-cü ildə keçib. O, hazırkı komandasında 336 oyuna 31 qol və 29 məhsuldar ötürmə müəllifi, 5 dəfə Çempionlar Liqasının, 3 dəfə İspaniya La Liqasının və eyni sayda klublararası dünya çempionatının qalibi olub.
Kazemiro 2011-ci ildən çıxış etdiyi Braziliya millisində isə 2019-cu il Amerika Kubokunun qalibi adını qazanıb və 2018-ci il dünya çempionatında iştirak edib. "Sambaçı" yığmada 63 matçda 5 qol vurub.
