"Ukrayna real sülh müqaviləsi naminə..." - Prezident Ofisi
“Ukrayna real sülh müqaviləsi naminə Krım məsələsini ertələyə bilər. Lakin ərazi bütövlüyümüzlə bağlı bütün məqamları Prezident Volodimir Zelenski həll edəcək”.
Demedia.az xəbər verir ki, bunu Ukrayna Prezident Ofisi rəhbərinin müşaviri Mixaylo Podolyak “RBK Ukraina”ya müsahibəsində deyib.
“Dövlət başçısı ərazi bütövlüyümüzlə bağlı öz mövqeyini dəfələrlə ifadə edib. Krım Ukraynanın ayrılmaz hissəsidir. Bu məsələnin ertələnməsi sülh müqaviləsinin imzalanması üçün ola bilər. Biz dəqiq bilmək istərdik ki, neçə ölkə yanımızda olacaq. Biz 44 gündür ki, mübarizəni davam etdiririk”, - o bildirib.
M.Podolyak, həmçinin rəsmi Kiyevin müvəqqəti barışıqda maraqlı olmadığını deyib: “Bizə davamlı sülh lazımdır. Müvəqqəti razılıq durumun daha da gərginləşməsinə səbəb ola bilər. Elə etmək lazımdır ki, Rusiyanın Ukrayna ərazisini atəşə tutmaq və sərhədlərimizi keçmək barədə düşüncülərə qapılması belə, mümkün olmasın”.
Bundan əvvəl Rusiyanın xarici işlər naziri Sergey Lavrov Rusiya və Ukrayna prezidentlərinin mümkün görüşündə Krım və Donbass məsələlərinin müzakirəsini “qəbuledilməz” adlandırmışdı.
